Gjuhe gjermane - UPPZ

Nga www.uppz.net




Në kuadër të universitetit të dytë shtetëror në Kosovë, Universitetit të Prizrenit, nga ky vit akademik do të funksionojë edhe Dega: Gjuhë Gjermane.

Studimet në fushën e gjuhës dhe letërsisë gjermane do të zgjasin 4 vjet dhe konform Deklaratës së Bolonjës do të përmbajnë gjithsej 240 ECTS (kredi). Për çdo semestër studenti do të jetë i detyruar të fitojë 30 ECTS, respektivisht 60 ECTS një vit akademik. Pas mbarimit të studimeve (në semestrin VIII), studenti përgatit një punim diplome i cili vlerësohet me 20 ECTS.

Dega e gjuhës dhe letërsisë gjermane i përfshinë disiplinat dhe fushat tematike fundamentale dhe profesionale të obligueshme dhe zgjedhore nga lëmi i gjuhës, linguistikës, letërsisë dhe kulturës gjermane, si dhe i kombinon ato me njohuri më të thella nga lëndët zgjedhore – përkthimore, mësimore ose akademike. Ato ofrojnë njohuri teorike dhe aftësi praktike, të cilat u nevojiten studentëve të kualifikohen në profesionin e tyre të ardhshëm si mësues, respektivisht si përkthyes të gjermanishtes ose t’i orientojë ata kah studimet pasdiplomike (master dhe doktoraturë) nga fusha e gjuhës, kulturës dhe letërsisë gjermane.

Programi studimor kryesisht është menduar asisoj, që të jetë në hap me zhvillimet e sotme të gjuhës dhe letërsisë gjermane dhe të jetë i përputhshëm me programet e ngjashme studimore në rajon, Evropë dhe më jerë.

Me përfundimin e studimeve të gjuhës gjermane merren titujt profesionalë: profesor i diplomuar i gjuhës gjermane dhe përkthyes i diplomuar nga gjuha gjermane, varësisht nga drejtimi i zgjedhur në vitin e tretë dhe të katërt.

Profesori i gjuhës dhe letërsisë gjermane është i kualifikuar të mbajë mësim në shkollat fillore dhe në të gjithë llojet e shkollave të mesme, si dhe në shkollat për gjuhë të huaja.

Përkthyesi i gjuhës gjermane arrin kualifikimin të përkthejë dhe interpretojë biseda gojore dhe tekste të shkruara nga gjuha gjermane në gjuhën shqipe dhe anasjelltas.